नगरस्तरीय सेभेन ए साइड फुटबल प्रतियोगिताको उपाधि हेटौंडा–११ स्थित हेटौंडा एकेडेमीले जितेको छ । फाइनल प्रतिस्पर्धामा हेटौंडा–१२ स्थित बुद्ध माध्यमिक विद्यालयलाई ट्राइबेकरमा ३–२ गोल अन्तरले हराउँदै हेटौंडा एकेडेमीले उपाधि जितेको हो । निर्धारित खेल १–१ गोलको बराबरीमा टुंगिएपछि खेलको निर्णय ट्राइबेकरबाट लिइएको थियो ।
सोमबारै भएको पहिलो सेमिफाइनल खेलमा हेटौंडा–९ स्थित प्रगति माविलाई पराजित गर्दै बुद्ध माविले फाइनलको यात्रा तय गरेको थियो । यस्तै, दोस्रो सेमिफाइनल खेलमा हेटौंडा–४ स्थित श्रमिक माविलाई पराजित गर्दै हेटौंडा एकेडेमी फाइनलमा पुगेको हो । फुटबल प्रतियोगिता श्रमिक माविको चौरमा भएको थियो । बुधबार रोयल प्यालेसमा हुने कार्यक्रममा फुटबलका विजेता तथा उपविजेता खेलाडीलाई पदक तथा प्रमाणपत्र र विद्यालयलाई ट्रफी प्रदान गरिने फुटबल प्रतियोगिताका संयोजक राजेश अधिकारीले जानकारी दिनुभयो ।